آئی سی سی ورلڈ کپ کے لیے پاکستان ویمنز ٹیم

ٹیم کی دیگر کھلاڑی انٹرنیشنل کرکٹ کا تجربہ رکھتی ہیں۔ اس ٹیم کی خاص بات یہ ہے کہ یہ تمام کھلاڑی کافی عرصے سے ایک ساتھ کھیل رہی ہیں اور ان میں بہت زیادہ ذہنی ہم آہنگی موجود ہے۔ ہیڈ کوچ محمد وسیم نے اپنی کوچنگ میں ان کھلاڑیوں پر بہت محنت کی ہے جس کا واضح ثبوت آئی سی سی ورلڈ کپ کوالیفائر میں پاکستان ویمنز ٹیم کی شاندار کارکردگی تھی۔
سب کو یاد ہوگا کہ جب یہ کوالیفائر ہورہا تھا تو کچھ حلقے پاکستان ویمنز ٹیم کے بارے میں زیادہ پرامید نہیں تھے لیکن اس ٹیم نے اپنی شاندار کارکردگی سے سب کو حیران کردیا تھا۔
پاکستان ویمنز ٹیم نے ورلڈ کپ کوالیفائر میں لگاتار پانچ میچوں میں کامیابی حاصل کرکے ورلڈ کپ میں جگہ بنائی تھی ۔ آئرلینڈ کے خلاف ڈیانا بیگ پلیئر آف دی میچ بنیں۔اسکاٹ لینڈ کے خلاف عالیہ ریاض بہترین کھلاڑی قرار پائیں۔ویسٹ انڈیز کے خلاف سدرہ امین نے پلیئر آف دی میچ ایوارڈ حاصل کیا۔فاطمہ ثنا نے تھائی لینڈ کے خلاف یہ اعزاز حاصل کیا اور بنگلہ دیش کے خلاف میچ میں منیبہ علی نے قابل ذکر کارکردگی دکھائی تھی۔
یہ اس بات کا واضح ثبوت تھا کہ ہر کھلاڑی کو اپنی ذمہ داری کا بھرپور اندازہ تھا ۔ ٹیم ایک ہوکر کھیل رہی تھی اور ہرمیچ میں ایک نئی کھلاڑی اپنی بہترین کارکردگی کے ساتھ نمایاں طور پر سامنے آئی تھی۔
پاکستان ویمنز ٹیم کی سب سے اہم بات کپتان فاطمہ ثنا کی اپنی شاندار کارکردگی بھی رہی ہے ۔ وہ اپنی عمدہ آل راؤنڈ انفرادی کارکردگی سے ٹیم کو فرنٹ سے لیڈ کررہی ہیں جیسا کہ انہوں نے ورلڈ کپ کوالیفائر میں بہترین پرفارمنس دی تھی۔ تھائی لینڈ کے خلاف میچ میں 62 رنزناٹ آؤٹ بنانے کے ساتھ ساتھ انہوں نے تین وکٹیں بھی حاصل کی تھیں جبکہ اسکاٹ لینڈ کے خلاف چار اور ویسٹ انڈیز کے خلاف تین وکٹوں کی کارکردگی اس کے علاوہ تھی۔
اس سے قبل نیوزی لینڈ کے خلاف کرائسٹ چرچ کے ون ڈے انٹرنیشنل میں بھی فاطمہ ثنا نے کریئر بیسٹ90 ناٹ آؤٹ اسکور کرنے کے علاوہ دو وکٹیں بھی حاصل کی تھیں جو ظاہر کرتا ہے کہ اگر کپتان بہترین پرفارمنس دے تو اس کا مثبت اثر پوری ٹیم پر پڑتا ہے۔